Viðbrögðin við uppátæki Hatara voru ekki mikil í keppnishöllinni, að sögn Gísla Marteins Baldurssonar, sem var kynnir í útsendingu RÚV frá keppninni. Gísli Marteinn var í viðtali í Silfrinu vegna málsins. Eins og flestir vita héldu hljómsveitarmeðlimir á lofti heimatilbúnu palestínskum fánum rétt fyrir lok útsendingar. Gísli segir að einhverjir hafi púað á Hatara fyrir tiltækið en margir listamenn hafi komið til Hatara og hrósað þeim fyrir þetta framtak.

Gísli tók fram að RÚV hafi verið fullkomlega ókunnugt um þetta. Hins vegar hafi þetta ekki komið á óvart:

„Ég held að raunverulega hafi það ekki komið neitt svakalega á óvart að Hatari hafi gert eitthvað með þessum hætti. Ég segi fyrir mig að ég óttaðist alveg að það gæti komið eitthvað sem væri alvarlegra og drægi þyngri dilk á eftir sér en þetta mun gera.“

Gísli veit ekki hvaða afleiðingar uppákoman hefur. RÚV styðji ekki að reglur keppninnar séu brotnar. Hins vegar hefur Gísli samúð með afstöðu Hatara enda sé það ekki ópólitísk ákvörðun að halda keppnina í Ísrael.

Gísli segist ekki vita hverjar afleiðingarnar verða en það eigi að vera hægt að ræða málið við yfirstjórn keppninnar og komast hjá mjög alvarlegum afleiðingum. Enn hefur Gísli ekki heyrt neitt um refsiaðgerðir, eins og t.d. þær að meina Íslandi þátttöku á næsta ári. Gísla þykir þó fremur hæpið gripið verði til harkalegra aðgerða. Ljóst hafi verið frá upphafi að Hatari væri mjög pólitískur hópur.