Vatnsnotkun Reykvíkinga minnkar mikið á meðan Eurovision stendur. Í gærkvöld var hún síðan í lágmarki á meðan Hatari, Madonna og Måns Zelmerlöw stigu á svið, samkvæmt fréttatilkynningu frá Veitum. Þar segir enn fremur:

„Vatnsnotkunin minnkar svo stöðugt allan tímann á meðan á keppninni stendur, tekur góða dýfu niður á við á meðan Hatari er á sviði sem og þegar úrslit eru tilkynnt. Við sjáum líka að vatnsnotkun minnkar nokkuð þegar Madonna flytur sitt atriði sem og þegar Måns Zelmerlöw stígur á svið, en hann þykir mikið sjarmatröll. Hvort það, eða tónlistarflutningur hans, sé ástæðan skal ósagt látið.“

Eins og nærri má um geta höfðuðu auglýsingarnar ekki eins mikið til landsmanna og þessir frábæru listamenn:

„Vatnsnotkunin eykst í auglýsingahléum eins og búast má við en leiða má líkum að því að margir hafi nýtt tækifærið og létt á sér á meðan á þeim stóð. Þegar útsendingunni lýkur vex notkunin hratt og fer aftur upp í það sem eðlilegt má teljast á laugardagskvöldi.“

Í lok fréttatilkynningarnir er minnt á mikilvægi vatnsverndar:

„Við erum svo heppin að þar er að fá nægt vatn fyrir alla borgarbúa til langrar framtíðar, jafnvel alveg þar til Ísland vinnur í Eurovision. Það á þó aðeins við ef okkur ber gæfa til að vernda þessa dýrmætu auðlind fyrir þeim fjölmörgu ógnum sem að henni steðja.“