Borið hefur á kartöfluskorti í verslunum upp á síðkastið, segir í tilkynningu frá Félagi atvinnurekenda. Þar segir að lítið sem ekkert framboð sé af innlendum kartöflum af viðunandi gæðum. Atvinnuvegaráðuneytið hefur hafnað því að afnema tolla til að auka framboð.
„Sú neitun kemur niður á hagsmunum neytenda, enda verða innfluttar kartöflur þá mun dýrari en þær ættu með réttu vera.“
Í tilkynningu á vef Félags atvinnurekenda segir að samkvæmt þeirra upplýsingum sé nánast ekkert til af innlendum kartöflum á Íslandi sem telja má í söluhæfum gæðum. Innflutningsfyrirtæki hafi frá því í byrjun síðustu viku þrýst á atvinnuvega- og nýsköpunarráðuneytið að bregðast við ástandinu. Jafnvel stærsti birgi innlendra kartaflna, Sölufélag garðyrkjumanna, hvetur ráðuneytið til að afnema tollana svo hægt verði að flytja inn kartöflur á hagstæðu verði til neytenda.
Ráðgjafanefnd um inn- og útflutning landbúnaðarvara hafnar því að um skort sé að ræða.
„Miðað við fyrirliggjandi gögn telur nefndin að það skilyrði laganna um að minnsta kosti tveir dreifingaraðilar hafi gert líklegt að vara væri eða yrði ekki til stöðugrar dreifingar sé uppfyllt. Hins vegar hefur rannsókn nefndarinnar ekki leitt í ljós að varan sé ekki eða verði ekki fáanleg hjá að minnsta kosti tveimur framleiðendum þar sem að tveir framleiðendur segja talsvert til af kartöflum og því ekki um skort að ræða.“
Ólafur Stephensen, framkvæmdastjóri Félags atvinnurekenda, segir að þó eitthvað sé til af innlendum kartöflum þá sé „nánast ekkert af innlendu framleiðslunni af þeim gæðum sem neytendur sætta sig við“. Jafnframt segir hann: „Það er algerlega óboðlegt að einstaka framleiðendur geti með órökstuddum yfirlýsingum um birgðir sínar ráðið skattheimtu ríkissjóðs.“.