„Hann var bara góður maður, það var bara þannig,“ sagði Jón Ásgeir Jóhannesson í þættinum Mannamál á Hringbraut í gærkvöldi. Þar ræddi Jón Ásgeir meðal annars um föður sinn, Jóhannes Jónsson sem oft var kenndur við Bónus. Jóhannes lést sumarið 2013, 72 ára að aldri.

Til eru margar sögur um Jóhannes, sem þótti bæði umdeildur en einnig maður fólksins í augum margra. Ein saga ber sérstaklega vott um það að Jóhannesi var umhugað um starfsfólk og aðstandendur þeirra þegar erfiðleikar knúðu dyra. Í október síðastliðnum rifjaði Kaffistofa Pressunnar upp sögu af því þegar mikils metinn starfsmaður Bónus féll frá.

Í verslun Bónus fyrir einhverjum árum starfaði ungur fjölskyldufaðir sem lét mikið á sér kveða. Hann var harðduglegur og eins og Jóhannes sjálfur, hrókur alls fagnaðar. En svo veiktist ungi fjölskyldumaðurinn og veikindin voru alvarleg. Fljótlega kom í ljós að við tæki barátta upp á líf og dauða. Og dauðinn tók, og eftir var ung kona með barni, heltekin sorg. Jóhannes ákvað að greiða útförina. Það má vera að það þyki mörgum sjálfsagt. En síðan tilkynnti Jóhannes hinni ungu ekkju að hún þyrfti ekki að hafa áhyggjur næsta árið hið minnsta. Jóhannes ákvað að eftirlifandi eiginkona myndi fá laun mannsins í eitt ár frá andláti hans.

Í viðtalinu á Hringbraut í gærkvöldi talaði Jón Ásgeir fallega um föður sinn. Aðspurður um stærstu kosti hans, sagði Jón Ásgeir:

„Skemmtilegur, opinn. Skemmtileg persóna og hafði gaman af lífinu,“ sagði hann og bætti við að þeir feðgar hefðu verið góðir vinir allt til enda. Sagði Jón Ásgeir að þeir hafi sjaldan rifist en þó getað tekist á um hlutina ef þeir voru ekki sammála. Þá sagði Jón Ásgeir að föður sínum hafi verið tíðrætt um það að fara ekki frá upprunanum og forðast græðgi í verslunarrekstri.

„Hann lifði eftir þessu að viðskipti eru viðskipti aðila að báðir þurfi að báðir að labba frá borðinu sáttir, annars væru það ekki viðskipti.“

Hér má sjá fyrri hluta viðtalsins við Jón Ásgeir en seinni hlutinn var sýndur í gærkvöldi.