„Hún er 15 ára, að verða 16 ára á þessu ári. Hún hefur alltaf verið miklu meira köttur en manneskja. Hún er náttúrlega með einhverfu og fannst mjög gaman að hlaupa á höndum og fótum þegar hún var krakki, fannst gaman að hafa eyru og skott og svona. Allar peysur sem voru með mynd af kisum fannst henni bara æðislegar. Svo þegar við kynntumst þessu þá var það bara næsta skref.“
Þetta segir Guðbjörg Ragnarsdóttir í þáttunum Nörd í Reykjavík sem sýndir eru á RÚV. Dóttir Guðbjargar skilgreinir sig sem „furry“ eða loðdýr, fólk sem ýmist laðast að dýrum með mannlega eiginleika eða skilgreinir sjálft sig sem slíkt. Slíkt fólk klæðist oft á tíðum sérstökum dýrabúningum. Guðbjörg segir að loðdýradýrkun og búningarnir sem fylgja hafa hjálpað mörgum. „Mikið af fólki sem fer ekki út úr húsi, en ef það er í búningi verður það önnur persóna og þarf ekki að vera það sjálft.“
Guðbjörg segir sjálf að skemmtilegast sé einfaldlega að klæða sig í búninga. „Að klæða sig í búninga, það er bara gaman. Og sumir eiga bara höfuð og hendur, kannski fætur, og eru svo bara í venjulegum fötum þar á milli. En það er náttúrulega skemmtilegast að eiga heilan galla.“