Margt bendir til þess að neysla kókaíns hafi aukist mjög á höfuðborgarsvæðinu undanfarin misseri, að minnsta kosti ef marka má magn þess í frárennslisvatni frá Reykjavík.

Fjallað var um málið á vef RÚV í morgun en þar kom fram að magn kókaíns í frárennslisvatni hafi fjórfaldast á tveimur árum. Þetta leiða rannsóknir á sýnum úr tveimur hreinsistöðvum í ljós. Þá er Ísland í 2. sæti af um 70 borgum í Evrópu þegar amfetamín í frárennslisvatni er skoðað.

Tekið er fram að sýnin fyrir nýjustu rannsóknina hafi verið tekin í mars fyrir ári síðan. Þá var magnið 474 milligrömm á hverja þúsund íbúa en árið 2016, tveimur árum áður, var magnið 128 milligrömm af kókaíni á dag á hverja þúsund íbúa.

Rætt er við Arndísi Sue-Ching Löve lyfjafræðing sem segir að þetta sé í samræmi við það sem sést hefur hjá ökumönnum sen teknir hafa verið fyrir akstur undir áhrifum fíkniefna. Þar hafi kókaín verið meira áberandi en áður.