Halldór Fannar Halldórsson starfaði í bankageiranum fyrir hrun en söðlaði svo um og endaði að lokum sem starfsmaður á leiksskóla. Hann nýtur sín í vinnunni þó svo að hann fái sambærileg laun og hann var með sem reynslulaus háskólanemi í sumarstarfi.
Frásögn Halldórs Fannars birtist á Facebook-síðu átaksins Fólkið í Eflingu. Þar má einnig finna fjölmargar aðrar sögur fólksins í stéttafélaginu, fólks sem vinnur margvísleg störf í íslensku samfélaginu en oft á tíðum fyrir lág laun.
Halldór Fannar ólst upp í Grafarvogi og útskrifaðist af stærðfræðibraut frá Verslunarskóla Íslands.
„Sumarið 2007 réð ég mig í sumarvinnu hjá Byr og þáði síðan fullt starf í þjónustuverinu. Á þessum tíma voru margir viðskiptavinir bankans vissulega reiðir og oft getur fólk verið dónalegra í gegnum síma sem ég fékk að finna fyrir og þess vegna segi ég alltaf að ég hafi verið stuðpúði fyrir sparisjóðinn á þessum fyrstu misserum eftir hrun.
Eftir þrjú ár í þjónustuverinu fékk ég nóg og vildi prófa eitthvað annað.“
Halldór Fannar starfaði meðal annars í byggingarvinnu og stundaði smíði í kvöldskóla. Þá starfaði hann hjá Minjavernd þar sem hann tók þátt í að gera upp sögufræg hús víða um land. Hann eignaðist síðan son og vildi þá fara í fjölskylduvænna starf.
„Upphaflega hafði ég hugsað mér að vinna á leikskólanum hans. En Reykjavíkurborg er með þessa stefnu, að foreldrar mega ekki vinna á sama leikskóla og barnið þannig að ég tók hlutastarfi á Ösp sem er í göngufæri við heimili okkar og Holt sem er leikskólinn hans.
Ég byrjaði í hlutastarfi og tók síðan við fullu starfi á leikskólanum. Ég get leyft mér að vinna hérna af því að ég og konan mín eigum okkar eigin íbúð í Breiðholtinu. Á leikskólum borgarinnar fær enginn launahækkun á grundvelli reynslu eða frammistöðu,“ segir Halldór Fannar en hann hefur notið reynslu vinnufélaga sinna sem hafa margir hverjir hafa áratugareynslu af leikskólastarfi. Sú reynsla hefur bæði hjálpað honum í vinnunni og sömuleiðis í foreldrahlutverkinu. Launin eru hins vegar ekki það sem stendur upp úr í leikskólastarfinu.
„Ég er 34 ára gamall, tveggja barna faðir, með þriggja og hálfs árs gamlan dreng og nýfætt stúlkubarn, ég er með sömu laun núna og ég hafði sem reynslulaus háskólanemi í sumarvinnu hjá banka fyrir 10 árum.
Fyrir fullt starf er ég með 250 þúsund krónur í laun eftir skatt, hinsvegar er ég í miklu mikilvægara starfi hérna á leikskólanum en hjá bankanum. Bara þetta segir mér að það er eitthvað mikið að í þessu þjóðfélagi.“
