Gunnar Smári Egilsson sósíalistaforingi og fyrrverandi útgefandi er ekki sáttur við hvernig Áramótaskaupið tók á Bjarna Benediktssyni formanni Sjálfstæðisflokksins og segir að valið á leikstjóra Skaupsins sé sambærilegt því og ef Jared Kushner, tengdasonur Donalds Trump, yrði fenginn til að leikstýra Saturday Night Live. RÚV greindi frá því að Arnór Pálmi Arnarson leikstjóri Áramótaskaupsins hafi verið í óformlegu sambandi með dóttur Bjarna á meðan framleiðslu Skaupsins stóð. Var einnig greint frá því að Sjálfstæðisfólk á borð við Áslaugu Örnu Sigurbjörnsdóttur, Gísla Martein Baldursson og Logi Bergmann Eiðsson, eiginmaður aðstoðarmanns Bjarna, hafi verið mjög sátt við Skaupið. „Með betri Skaupum sem ég hef séð. Eitthvað fyrir alla, stuttir og öflugir sketsar, fjölbreytt, elskaði lögin, öflugar ádeilur og ekkert of rætið,“ sagði Áslaug Arna á Twitter.

Gunnar Smári segir að ánægja Gísla Marteins og Loga Bergmanns með Skaupið megi skýra með því að söguskýringar Bjarna og Sjálfstæðisflokksins hafi verið teknar gildar: „Bíddu, fyrst setur sýslumaður Sjálfstæðisflokksins lögbann á umfjöllun óháðra aðila um spillingi Bjarna Ben og svo felur Ríkisútvarpið vonbiðli dóttur Bjarna að leikstýra áramótaskaupinu. Ekki að undra að hægri drengir eins og Gísli Marteinn og Logi Bergmann séu að pissa í sig af hlátri. Samkvæmt skaupinu sprakk ríkisstjórn Bjarna ekki vegna varðstöðu hans með vini bjarnaníðings, sem vill svo til að er faðir Bjarna, gegn skýrum kröfum þolanda níðingsins, heldur út af unglingslegum dillum í krökkunum í Bjartri framtíð. Sem er einmitt sú söguskoðun sem Bjarni hefur haldið á lofti,“ segir Gunnar Smári á Facebook. Því skal þó halda til haga að Dóra Jóhannsdóttir, yfirhandritshöfundur Áramótaskaupsins, sagði að Arnór Pálmi hefði ekki haft atkvæðisrétt þegar rætt var um Bjarna í Skaupinu.

Gunnar Smári segir að Ísland sé í sérflokki spillingar: „Sjáið þið fyrir ykkur að Bandaríkjamenn myndu sætta sig við Jared Kushner sem leikstjóra Saturday Night Live?“