Lögreglustjórinn á Suðurnesjum greinir frá því á Facebook að innbrotsþjófar hafi brotist inn á æfingasvæðum Keflavíkur og Njarðvíkur við Afreksbraut í Reykjanesbæ og kúkað á gólfið. Lögreglan birtir myndir af skemmdaverkunum og kúknum.
„Lögreglan á Suðurnesjum er með til rannsóknar mál sem varðar eignaspjöll á æfingasvæðum Keflavíkur og Njarðvíkur við Afreksbraut í Reykjanesbæ. Þarna voru rúður brotnar, salerni og vaskar stífluð, veggir spreyjaðir og skemmdarvargarnir gengu það langt að þeir gerðu stykkin sín á gólfið í aðstöðu félaganna,“ segir í stöðufærslunni.
Lögregla óskar eftir vitnum. „Við ákváðum að birta ljósmyndir af þessum skemmdarverkum og biðjum ykkur sérstaklega að skoða myndirnar þar sem búið er að spreyja á veggina og athuga hvort að þið þekkið eitthvað til þessara „verka“. Ef einhver þarna hefur vitneskju um hver eða hverjir voru þarna að verki þá endilega hringið í okkur eða sendið okkur skilaboð hér á Facebook,“ segir í stöðufærslunni.
