Ingólfur Páll Matthíasson, umhverfissinni og leiðsögumaður opnaði í vikunni ruslagám við verslun Krónunnar. Honum blöskraði innihald gámsins en þar mátti sjá mikið af matvöru sem að sögn Ingólfs er í góðu lagi með. Hann birti í kjölfarið mynd innan úr gámnum á Facebook-síðu sinni en myndin sem sjá má hér að neðan hefur vakið töluverða athygli.
Ingólfur bendir á að þó svo að myndin sé tekin í ruslagámi við verslun Krónunnar þá sé sú verslun alls ekki sú eina sem stundar það að henda mat. „Það er samt hálf fyndið að sjá þetta við verslun sem státar sig að því að minnka matarsóun,“ segir Ingólfur en á vef Krónunnar segir að fyrirtækið leiti sífellt nýrra leiða til að minnka matarsóun.
„Við leggjum áherslu á að sýna umhverfinu virðingu og leitum sífellt nýrra leiða við að minnka matarsóun og fækka vistsporum Íslendinga. Í verslunum Krónunnar bjóðum við upp á þroskað grænmeti, ávexti, útlitsgallaðar vörur og vörur á síðasta söludegi á lækkuðu verði í stað þess að vörum sé fargað,“ segir á vef Krónunnar.
Ingólfur segir að með þessu sé verið að móðga marga. „Þetta er móðgun við fátækt fólk, þetta er móðgun við afurðir bænda og þetta er mikil móðgun við umhverfið en eins og sjá má myndinni er plast utan um þetta allt,“ segir Ingólfur.
„Við erum að verða á pari við mestu umhverfissóða heims og það virðast flestir vera með hausinn upp í rassgatinu á sér þegar kemur að þessum málum,“ segir Ingólfur sem biðlar til verslunareigenda að taka sér tak og fara að hugsa betur um umhverfið.
https://www.facebook.com/ingolfur.matthiasson/posts/10214422600431702
