Dieter M. Weidenbach, 72 ára myndlistarmaður frá borginni Thüringen í Þýskalandi brá heldur betur í brún þegar hann kom inn á vinnustofu sína, föstudagsmorguninn 8. desember. Allt var á rúi og stúi og miklar skemmdir höfðu verið unnar á verkum hans. Sökudólgurinn var hins vegar ekki manneskja heldur þvottabjörn.
Bild greinir frá þessu.
„Þetta var eins og að stíga inn á vígvöll“ segir Weidenbach. Málning var út um allt og miklar skemmdir unnar á listaverkum hans. Fyrst hélt hann að um innbrot væri að ræða en sá fljótt að hvorki lásar né gluggar væru brotnir. Þá sá hann að mörg verkanna voru klóruð.
Weidenbach skildi lítið í þessu og byrjaði að taka til á vinnustofunni. Hann sá þá að engum listaverkum hafði verið stolið heldur aðeins skemmd. Þegar honum var litið til lofts sá hann sökudólginn sitja þar á bjálka, það er þvottabjörn sem hafði komist inn um gat á loftinu.
„Hann horfði rólegur á mig með sætu augunum sínum. Hann hafði fallegan mjög fallegan feld en ég var samt svo reiður“ segir Weidenbach. Þvottabjörninn hafði skemmt fjörutíu listaverk og önnur vinnutól, ramma og striga. Heildarskaðinn er fimm þúsund evrur (600 þúsund krónur).
Ævintýrinu lauk þó ekki þar því að Weidenbach gat ekki handsamað þvottabjörninn. „Ég elti hann í tvo daga með tréstaf og reyndi að reka hann út. En ódámurinn varði nýja svæðið sitt. Að lokum gafst ég upp og hringdi á slökkviliðið.“ Hjá slökkviliði Thüringen var honum sagt að tala við veiðimann sem hann og gerði. En þvottabjörninn hafði vit á því að flýja vinnustofuna áður en veiðimaðurinn mætti á svæðið.
