Minnstu mátti muna að mjög illa færi þegar bílstjóri rútu einnar, með tuttugu og tvo um borð, féll í yfirlið undir stýri.
Atvikið átti sér stað í austurrísku Ölpunum um helgina og geta farþegar þakkað 65 ára frönskum ferðamanni fyrir að ekki fór verr. Að því er BBC greinir frá leið yfir bílstjóra rútunnar, sem er 76 ára, á mjög hættulegum vegarkafla í Ölpunum.
Franski ferðamaðurinn sat framarlega í rútunni og hann stökk til þegar rútan var á leið út af veginum og náði að bremsa. Rútan endaði á öryggisgrind og staðnæmdist, en ljóst má vera að hefði rútan verið á meiri ferð hefði grindin gefið sig og rútan steypst niður mikinn bratta.
„Við vorum hársbreidd frá stórslysi,“ segir austurrískur lögreglumaður í samtali við AFP-fréttastofuna og bætir við að það sé í raun stórkostleg heppni að franski ferðamaðurinn hafi náð að stíga á bremsuna í tæka tíð.