Haustið 2013 gengu John Polo og unnusta hans, Michelle, í hjónaband í skyndi en þá var Michelle mjög veik af völdum nýrnakrabbameins. Þau voru gefin saman í borgaralegri vígslu en ætluðu síðan að hafa stórt brúðkaup þegar Michelle hefði náð bata.
En Michelle náði ekki að ganga inn kirkjugólfið í brúðarkjólnum sínum. Hún lést í janúar 2016 þrítug að aldri. Tveimur vikum síðar höfðu hjónin stefnt á að hafa kirkjubrúðkaupið langþráða. Today skýrir frá þessu.
Viku eftir að Michelle lést var John að skoða myndir í símanum hennar. Þar fann hann mynd sem hafði verið tekin í leyni og hann átti ekki að sjá fyrr en eftir kirkjubrúðkaupið. Á myndinn sást hún sjálf í brúðarkjólnum.
„Ég lá í rúminu okkar og skoðaði myndirnar í símanum hennar í fyrsta sinn. Þegar ég sá þessa mynd varð ég glaður og óhamingjusamur á sama tíma en ég varð fyrst og fremst stoltur af konunni minni. Ég grét og hló á sama tíma.“
Michelle og John kynntust fyrir 15 árum þegar þau voru samtíða í menntaskóla. Þau urðu kærustupar en slitu síðan sambandinu. Michelle eignaðist síðan dóttur með öðrum manni. 2011 hittust Michelle og John á nýjan leik og voru saman þar til hún lést.
Síðustu vikum lífsins eyddi hún á líknardeild en hún var mjög veik. Hún var að sögn mjög hrædd um að hún myndi gleymast eftir dauða sinn og því byrjaði John að halda úti bloggsíðu um hana til að heiðra minningu hennar.
„Ég vil gjarnan bera út boðskapinn um að þú getir lifað sorg af. Ég held að ég sé sönnun þess. Þegar þú hefur lifað hana af getur þú lifað aftur. Þú getur brosað á nýjan leik.“
