Brynjar Níelsson veit hvaða tveir valinkunnu einstaklingar mæltu með því að Robert Downey, áður Róbert Árni Hreiðarsson fengi uppreist æru. Brynjar er formaður stjórnskipunar og eftirlitsnefndar og segir í samtali við RÚV að aðrir í nefndinni muni ekki fá gögnin í hendur. Þau séu trúnaðarmál. Fréttir þess efnis að Robert hefði hlotið uppreist æru vakti mikla athygli fyrr í sumar. Getur Róbert nú starfað aftur sem lögmaður. Róbert var dæmdur í þriggja ára fangelsi fyrir kynferðisbrot gegn fjórum stúlkum og missti hann lögmannsréttindi sín í kjölfarið.
Fjölmiðlar á Íslandi hafa reynt að fá gögnin í sínar hendur, þá hver það var sem mælti með að Robert hlyti uppreist æru en verið neitað. Hefur ákvörðun ráðuneytisins verið kærð til úrskurðarnefndar um upplýsingamál.
„Meðmælandabréfin fá þeir ekki,“ sagði Brynjar við RÚV þegar hann var spurður hvort aðrir í nefndinni myndu fá að sjá bréfin. Bætti hann við að þau væru algjört trúnaðarmál. Nefndarmenn muni hins vegar fá að sjá þau á fundinum. Nefndarmenn eru ásamt Brynjari:
Birgitta Jónsdóttir, Njáll Trausti Friðbertsson, Lilja Alfreðsdóttir, Jón Steindór Valdimarsson, Jón Þór Ólafsson, Haraldur Benediktsson, Svandís Svavarsdóttir og Hildur Sverrisdóttir.
