Lögreglan fann skothylki í læk í Fossvogsdal
„Eftir nokkra leit fundum við skothylki ofan í læknum,“ segir Gunnar Hilmarsson, aðalvarðstjóri, en lögreglan var með mikinn viðbúnað Kópavogsmegin við Fossvogsdal í gærkvöldi.
Tilkynning um skothvell barst lögreglunni á höfuðborgarsvæðinu um klukkan 20:30 í gærkvöldi. Þá hafði maður sem var að viðra hundinn sinn í Fossvogsdal, fyrir neðan Reyni- og Birkigrund í Kópavogi, heyrt skothvell og séð karlmann á hlaupum með eitthvað sem hann taldi vera skammbyssu.
Að sögn Gunnars var lýsingin á manninum, sem er grunaður um að hafa skotið úr vopninu, nokkuð ójós: „Það var kolniðamyrkur svo vitnið sá hann illa. Það eina sem við vitum er að hann var dökkklæddur.“
Í framhaldinu fóru fimm lögreglubílar á vettvang. Þar af einn frá sérsveit ríkislögreglustjóra. Eftir nokkra leit í hverfinu fannst skothylki ofan í læk í Fossvogsdal. „Það bendir allt til þess að einhver hafi hleypt af skotvopni. Að öllum líkindum skammbyssu.“
Meintur byssumaður er þó enn ófundinn en það er skýrt brot á vopnalögum að vera með vopn í þéttbýli. „Rannsókn er komin með málið og vonandi kemst einhver botn í það.
Gunnar vill jafnframt koma því á framfæri að atvikið tengist hvorki uppákomu í hverfinu, sérstöku heimili eða atvinnuhúsnæði. „ Mögulega var einhver að fikt með skotvopn og hleypti af byssunni ofan í þennan læk eða í dauðan hlut og lét sig svo hverfa.“