Óttarr Proppé heilbrigðisráðherra hefur að undirlagi sóttvarnalæknis ákveðið að skipa starfshóp til að stemma stigu við útbreiðslu kynsjúkdóma hér á landi. Þetta kemur fram á vef velferðarráðuneytisins.
Hópurinn á að setja fram tillögur um aðgerðir til að bregðast við aukinni útbreiðslu kynsjúkdóma á landinu. Tíðni kynsjúkdóma hefur aukist mikið undanfarin ár, svo sem á sárasótt, lekandi og HIV/alnæmi. Sambærileg þróun hafi orðið í öðrum vestrænum löndum. Brýnt sé að snúa við þróuninni og grípa til aðgerða og aukins samráðs, svo sem við heilbrigðiskerfið og skólakerfið.
Hópinn skipa Þórólfur Guðnason sóttvarnalæknir, sem er formaður hópsins, Már Kristjánsson, yfirlæknir smitsjúkdómadeildar LSH, Baldur Tumi Baldursson, yfirlæknir húð- og kynsjúkdómadeildar LSH, Elísabet Reykdal Jóhannesdóttir, húð- og kynsjúkdómalæknir, fulltrúi sóttvarnaráðs, Ragnhildur Sif Hafstein, fulltrúi velferðarráðuneytisins og starfsmaður starfshópsins.