Tillagan kemur til vegna banaslyss í Ártúnsbrekku rétt fyrir jólin 2015
„Rannsóknarnefnd samgönguslysa beinir þeirri tillögu til Innanríkisráðuneytisins að taka til skoðunar að hjólreiðar verði bannaðar á fjölakreinavegum í þéttbýli þar sem umferðarþungi og hraði er mikill,“ segir í tillögu rannsóknarnefndar samgönguslysa til öryggisáttar.
Tilefnið er banaslys sem varð í Ártúnsbrekku að morgni 21. desember árið 2015 þegar ekið var á hjólreiðamann.
Slysið varð með þeim hætti að ekið var aftan á hjólreiðamanninn á Vesturlandsvegi vestan Höfðabakka. Myrkur var úti og þriggja stiga frost þennan morgun, en samkvæmt því sem fram kemur í skýrslunni fara 74.400 ökutæki þennan veg að meðaltali á degi hverjum.
Í skýrslu vegna slyssins leggur nefndin til, sem fyrr segir, að lagt verði bann við hjólreiðum á umferðarmiklum fjölakreinavegum á höfuðborgarsvæðinu, að reglugerð um gerð og búnað reiðhjóla verði tekin til endurskoðunar og brýnt verði á reglum um aukahluti í sjónsviði ökumanna bifreiða, eins og það er orðað. Þá er einnig ábending til bæði ökumanna og hjólreiðamanna um sýnileika og akstur í skammdeginu.
Bifreiðinni, sem ekið var á hjólreiðamanninn, var ekið lengst til hægri upp Ártúnsbrekku og var einn farþegi í aftursæti bifreiðarinnar. Í skýrslunni kemur fram að ökumanni og farþega hafi borið saman um að hvorugur hefði séð hjólreiðamanninn fyrr en rétt áður en til árekstrar kom. Sveigði ökumaður þá til vinstri sem reyndist of seint og náði hann ekki að forða slysinu.
Í orsakagreiningu kemur fram að vegurinn sé hættulegur fyrir hjólreiðamenn, hjólreiðamaðurinn hafi ekki gætt nægilegrar aðgæslu með því að hjóla á veginum, en að sama skapi hafi ökumaðurinn ekki verið með fulla athygli við aksturinn og séð hjólreiðamanninn of seint. Þá var bifreiðinni ekið yfir leyfilegan hámarkshraða sem er 80 kílómetrar á klukkustund. Samkvæmt GPS-mæli hafi bifreiðin verið á 92 kílómetra hraða rétt fyrir slysið en ökumaðurinn hafi talið sig vera á 85 kílómetra hraða.
Í skýrslunni kemur fram að mikil hætta sé á að afleiðingar áreksturs milli hjólreiðamanns og bifreiðar verði mjög alvarlegar þegar ökuhraði er mikill.
„Eins skapar mikill munur á hraða farartækja aukna hættu á slysum. Þegar hraðamunur er mikill nálgast farartæki hvort annað mun hraðar en ella og er því minni tími til að bregðast við ef hætta skapast. Hjólreiðar á fjölakreinavegum þar sem hraði er mikill eru hjólreiðamönnum afar hættulegar. Hjólreiðamaður á t.d. í erfiðleikum með að fylgjast með umferð fyrir aftan sig við akreinaskipti. Einungis er hægt að líta í örskotsstund aftur fyrir sig án þess að eiga á hættu að missa stjórn á hjólinu,“ segir í skýrslunni.
Vísað er í 25. grein sáttmála Sameinuðu þjóðanna um umferð á vegum þar sem segir að banna skuli umferð gangandi vegfarenda, reiðhjóla og léttra bifhjóla á hraðbrautum eða samskonar vegum.
„Líkja má sumum einstökum stofnbrautum á höfuðborgarsvæðinu við hraðbrautir, að minnsta kosti á köflum. Rannsóknarnefnd samgönguslysa beinir þeirri tillögu til Innanríkisráðuneytisins að taka til skoðunar að hjólreiðar verði bannaðar á fjölakreinavegum í þéttbýli þar sem umferðarþungi og hraði er mikill,“ segir í skýrslunni.
