Forstjóra Siðaskrifstofu Bandaríkjastjórnar líst ekkert á þær fyrirætlanir Donald Trump Bandaríkjaforseta að ætla að afhenda sonum sínum viðskiptaveldi sitt, áður en hann tekur við embættinu þann 20. janúar næstkomandi. BBC er á meðal þeirra miðla sem frá þessu greina í dag.
Áætlanirnar fullyrði engan veginn lagaskilyrðum og siðferðisviðmiðum Bandaríkjaforseta síðastliðin 40 ár og hann gagnrýnir Trump harðlega. Allir síðari tíma forsetar hafi gengist undir þá kvöð að losa sig við öll ítök í heimi viðskipta. Hefð er fyrir því að allar eignir forseta renni inn í fjárfestasjóð sem fer í umsjón óháðs fjárhaldsmanns. Forsetinn fær engar upplýsingar um fjárfestingar eða annað sem gerist á meðan hann er forseti. Trump hyggst aftur á móti láta sonum sínum eftir yfirráð yfir auðæfum sínum, sem og sinn helsta ráðgjafa, Allen Weisselberg.
Forstjóranum, Walter Shaub, líst ekkert á þetta og segir að þessi ráðstöfun komi ekki í veg fyrir hagsmunaárekstra. Trump myndi með þessum hætti fá fréttir af viðskiptum og væri í lykilstöðu til að hafa áhrif á ákvarðanir. Eina ásættanlega lausnin væri að láta nafnlausan fjárfestingasjóð taka við eignunum.
Á blaðamannafundi í gær, þar sem lögfræðingur Trumps, Sherri Dillon, fór yfir málið, sagði hún að Trump vildi ekki að það væri neinum vafa undirorpið, að hann myndi einangra sig frá öllum sínum viðskiptahagsmunum á meðan hann væri forseti. Synir hans (og ráðgjafinn) myndu taka allar ákvarðanir án nokkurra afskipta pabba síns.