Síðar í dag fellur dómur í Hæstarétti í hópnauðgunarmáli gegn fimm piltum sem voru sýknaðir í héraðsdómi Reykjavíkur nóvember í fyrra af ákæru um að nauðga sextán ára stúlku í heimahúsi í Breiðholti í maí 2014. Þetta kemur fram á RÚV. Piltarnir voru þá á aldrinum sautján til nítján ára.

Piltarnir voru meðal annars ákærðir fyrir að halda stúlkunni nauðugri í svefnherbergi íbúðar þar sem þeir voru sagðir hafa beitt hana ofbeldi.

Þá var sagt að þeir hefðu nýtt sér yfirburðastöðu og aðstöðumun gagnvart stúlkunni sem hafi mátt síns lítils gegn þeim, lömuð af hræðslu og fjarri öðrum.

Einn piltanna var einnig ákærður fyrir að færa stúlkuna í annað herbergi og nauðga henni þar, að sögn RÚV. Loks var einn mannanna ákærður fyrir að taka upp myndband af hluta nauðgunarinnar.

Var hann sagður hafa sýnt samnemendum stúlkunnar myndbandið í skólanum eftir að meint hópnauðgun átti sér stað.

Hópnauðgunarmálið vakti gríðarlega athygli og mikla reiði í samfélaginu en einn piltanna tók myndband af athæfinu. Hann var sömuleiðis ákærður fyrir dreifingu myndbandsins.

Maðurinn var sýknaður af dreifingunni en sakfelldur fyrir upptökuna. Efni myndbandsins hafði ekki áhrif á sýknu vegna nauðgunar. RÚV greinir frá því að myndskeiðið hafi verið mjög óskýrt. Það var um það bil 10 sekúndna myndataka af upprunalegu upptökunni sem hafði verið eytt.