Atli Gíslason lögmaður og fyrrverandi alþingismaður Vinstri grænna segir Jóhönnu Sigurðardóttur fyrrverandi forsætisráðherra og Steingrím J. Sigfússon þáverandi fjármálaráðherra hafa hótað samflokksmönnum og beitt blekkingum. Var það gert í þeim tilgangi til að fá þingmenn til að samþykkja að sækja um aðild að Evrópusambandinu. Segir Atli ferlið hafa verið kostulegt. Atli ræddi málin á Útvarpi Sögu í dag.
Þann 16. júlí árið 2009 samþykkti Alþingi með 33 atkvæðum gegn 28 að hefja aðildarviðræður við ESB. Tuttugu þingmenn Samfylkingar sögðu já og átta af fjórtán þingmönnum Vinstri grænna. Í mars mánuði 2015 tilkynnti Gunnar Bragi Sveinsson utanríkisráðherra að Ísland væri ekki lengur í viðræðum um aðild að sambandinu. Var það harðlega gagnrýnt þar sem almenningur taldi að stjórnarflokkarnir hefðu gengið á bak orða sinna og svikið að þjóðin fengi að kjósa um málið.
Atli sagði í samtali við Arnþrúði Karlsdóttur á Sögu að Steingrímur J. Sigfússon hefði sagt samflokksmönnum að ef þeir samþykktu að leggja fram umsókn yrði henni hent út af borðinu að átján mánuðum liðnum. Atli var í þættinum til að ræða bók sína Villikettirnir þar sem hann fjallar meðal annars um þingferil sinn og flokkinn sem hann sat á þingi fyrir, Vg.
„Hann [Steingrímur] sagði að málið yrði frá eftir 18 mánuði þar sem sjávarútvegskaflinn yrði aldrei samþykktur af okkur.“
Atli lýsir svo kosningunni á þessa leið.
„ … en síðan fór atkvæðagreiðslan fram og hún tók langan tíma. Það var út af því að menn gerðu grein fyrir atkvæði sínu. Í bókinni er það tekið upp hvort menn sögðu já eða nei. Kostulegasta atkvæðaskýringin á blaðsíðu 95 þar sem Svandís Svavarsdóttir gerir grein fyrir atkvæði sínu. Lýsir hún öllum megin boðum gegn Evrópusambandinu og endar með því að segja: „Ég segi já.“ Þingsalur stóð agndofa og horfði á hana og hugsaði: „Hún er bara að skipta um skoðun.“ Svo hló salurinn á eftir þegar jáið kom.“
Jafnframt segir Atli Jóhönnu ítrekað hafa beitt hótunum og undir þeim hafi verið erfitt að sitja.
„Ætlar þú að bera ábyrgð á því að fyrsta vinstri stjórn á Íslandi fellur? Þessar hótanir hafði Jóhanna stöðugt uppi við einstaklinga og aðra. Það var erfitt að sitja undir þessu.“
