Íslendingar munu ekki fá aðhlynningu á spítalanum nema þeir séu með tryggingu hjá erlendu tryggingafélagi
Henri Middeldorp, stjórnarformaður félagsins MCPB ehf., sem hyggst byggja 30 þúsund fermetra byggingu í Mosfellsbæ sem mun hýsa einkarekna heilbrigðisstofnun og hótel, vísar ummælum sem Kári Stefánsson lét falla í gær til föðurhúsanna.
Kári sagði í aðsendri grein í Fréttablaðinu að spítalinn myndi rústa íslensku heilbrigðiskerfi. Þannig gæti farið svo að fjölmargir íslenskir heilbrigðisstarfsmenn myndu ráða sig í vinnu á umrætt sjúkrahús á sama tíma og erfitt er að manna stöður á íslenskum heilbrigðisstofnunum og sjúkrahúsum. „Útlendingaspítalinn myndi því rústa því sem eftir er af íslensku heilbrigðiskerfi og gera endurreisn þess margfalt erfiðari en ella,“ sagði Kári og bætti við að lífi og limum landsmanna stafaði hætta af þessum hugmyndum.
Ráðgerð er að spítalinn rísi á landi við Sólvelli í Mosfellsbæ sem er staðsett við Hafravatnsveg.
Henri Middeldorp er stjórnarformaður félagsins sem hyggst ráðast í uppbygginguna í Mosfellsbæ. Í viðtali í Fréttablaðinu í dag segir Henri að tilgangurinn sé ekki að grafa undan íslensku heilbrigðiskerfi.
„Hvernig getur þú grafið undan heilbrigðiskerfi ef kerfið er sjálft að grafa undir sér?“ spyr Middeldorp. „Ef fólk kvartar undan því að við séum að rústa einhverju þá þarf að vera eitthvað til þess að rústa, ef svo má segja,“ segir hann. Hann segir að honum hafi sárnað ummæli Kára. „Ummælin hryggja mig því það er ekkert til að rústa.“
Þá kemur fram í viðtalinu að Middeldorp ætli að setja sig í samband við fjárfesta í verkefninu og biðja um leyfi til að upplýsa um það hverjir standa að baki verkefninu. Hann segir verkefnið fjármagnað að fullu en áætlanir gera ráð fyrir að uppbyggingin muni kosta um 50 milljarða króna.
Loks segir Middeldorp að Íslendingar muni ekki fá þjónustu á sjúkrahúsinu nema þeir séu tryggðir af erlendu tryggingafélagi. Þá verði heilbrigðisstarfsfólkið erlent en fjöldi Íslendinga verði einnig ráðinn í önnur störf.