Leikstjórinn og rapparinn Ágúst Bent var þann 19.febrúar síðastliðinn dæmdur tilað greiða Friðriki Rafni Larsen, stjórnarformanni ÍMARK, 488 þúsund krónur í skaðabætur vegna líkamsárásar. Þá hlaut Bent einnig skilorðsbundinn fangelsisdóm.

Þetta kemur fram á Vísi en líkt og DV greindi frá í janúar síðastliðnum átti umrædd árás sér stað á skemmtistaðnum Loftinu þann 14.mars í fyrra.

Var Bent ákærður fyrir að hafa ráðist á Friðrik og slegið hann ítrekuðum hnefahöggum í andlitið með þeim afleiðingum að hann hlaut ótilfært brot á vinstra nefbeini, bólgur og mar á nefi og augnsvæði og sprungna vör. Fjölmörg vitni voru að árásinni. Fyrir dómi játaði Bent að hafa ráðist á Friðrik og slegið hann en neitaði hins vegar afleiðingum árásarinnar. Lögfræðingur Friðriks setti fram kröfu um fjórar milljónir í skaðabætur.

Líkt og fram kemur í frétt Vísis mun Bent þurfa að greiða Friðriki 488 þúsund krónur í skaðabætur. Þá var hann dæmdur í 60 daga skilorðsbundið fangelsi.