Leikstjórinn og tónlistarmaðurinn Ágúst Bent hefur verið ákærður fyrir líkamsárás sem átti sér stað á skemmtistaðnum Loftinu þann 14.mars í fyrra. DV greindi frá málinu á sínum tíma að hefði umrætt kvöld ráðust á Friðrik Larsen, stjórnarformann ÍMARK og voru fjölmörg vitni að árásinni.

Meint brot Bents varðar allt að þriggja ára fangelsi en fram kemur á Vísi að samkvæmt ákæru sé honum gefið að sök að hafa slegið Friðrik ítrekuðum hnefahöggum í andlitinu með þeim afleiðingum að hann hlaut „ótilfært brot á vinstra nefbeini, bólgur og mar á nefi og augnsvæði og sprungna vör.“

Bent mun hafa játað líkamsárásina fyrir dómi en neitað afleiðingum hennar.

Í yfirlýsingu sem Einar Hugi Bjarnason, lögfræðingur Friðriks, sendi DV í mars á síðasta ári kom fram að árásin hafi verið „harkaleg og tilefnislaus“ og án nokkurs aðdragana. Gerir hann kröfu um fjórar milljónir króna í skaðabætur fyrir hönd skjólstæðings síns samkvæmt frétt Vísis.

Bent tjáði sig stuttlega um atvikið í útvarpsþættinum FM95BLÖ í apríl síðastliðnum: „Ég get kannski ekki sagt ítarlega frá því hvað gerðist en ég skeit í raun bara á mig. Ég gerði mistök og missti mig í fimm sekúndur og það mun draga dilk á eftir sér í töluvert lengri tíma en það,“ sagði hann og bætti svo við: „Ég mun alltaf taka út einhverja refsingu fyrir þetta, fyrir utan það mannorðsmorð sem nú þegar hefur átt sér stað, og réttilega. Ég mun fá dóm og þarf að borga peninga. Ég verð bara að læra af þessu.“