Ný auglýsing frá Icelandic Glacial hefur vakið mikla athygli á samfélagsmiðlum undanfarna daga. Samkynhneigðum manni bregður fyrir í auglýsingunni. Fyrirtækið er því komið í hóp fjölmargra stórfyrirtækja sem styðja opinberlega við réttindabaráttu samkynhneigðra.

Icelandic Glacial vatnið sem er selt víða um heim, en er flutt út frá Íslandi, frumsýndi auglýsingu í vikunni þar sem samkynhneigðum karlmanni bregður fyrir. Það þykir merkilegt fyrir baráttu samkynhneigðra að fá slíka viðurkenningu frá stórfyrirtæki. Auglýsingin hefur hlotið gríðarlega góðar viðtökur.

Eigandi fyrirtækisins og stjórnarformaður Icelandic Water Holdins hf, Jón Ólafsson, segist ánægður með auglýsinguna og jákvæð viðbrögð sem þau hafa fengið við henni.

„Fólk hefur rétt á að vera það sjálf. Það eru bara grunnmannréttindi,“ segir Jón í samtali við Gayiceland.is
Auglýsingin sýnir hóp kvenna ásamt einum samkynhneigðum manni standa við glugga og bíða eftir því að lögulegur karlmaður stígi upp úr sjónum og fái sér vatnssopa. Auglýsingin er stæling á gamalli auglýsingu frá Diet Coke frá árinu 1983, en í þeirri útgáfu voru það eingöngu gagnkynhneigðar konur sem góndu á myndarlega manninn á ströndinni.

Með auglýsingunni er fyrirtækið komið í hóp stórfyrirtækja á borð við Tylenol, Macy´s, American Airlines og IKEA sem eiga það sameiginlegt að samkynhneigðir einstaklingar hafa komið við sögu í auglýsingum þeirra.

Auglýsing Icelandic Glacial sem var aðeins dreift á samfélagsmiðlum hefur fengið mjög góð viðbrögð. Meira en 600 þúsund hafa séð myndbandið á Facebook og og yfir 50 þúsund einstaklingar á YouTube og Instagram.

[youtube https://www.youtube.com/watch?v=s1OTJrnkc48&w=640&h=360]