Náttúruverndarsvæðið hernumið í 41 daga – Engin átök á milli landtókufólksins og lögreglu
Hernámi Malheur náttúruverndarsvæðisins í Oregon-ríki í Bandaríkjunum er lokið. Í nótt gafst síðasta landtökufólkið upp fyrir alríkislögreglunni, sem setið hefur um svæðið í meira en mánuð.
Samkvæmt Reuters urðu engin átök á milli lögreglu og fólksins og engu skoti var til að mynda hleypt af í aðgerðum lögreglunnar í gær.
Þar segir að fjórir einstaklingar hafi verið í aðalbyggingu svæðisins og að lögreglan hafi umkringt bygginguna. Fólkið, hjón á miðjum aldri og karlmaður á svipuðum aldri, gafst fljótt upp fyrir lögreglu en sá síðasti, ungur karlmaður, kom klukkustund síðar.
Þá hafði ungi maðurinn hótað að fremja sjálfsvíg, þar sem hann vildi frekar deyja frjáls maður. Það gerði hann þó ekki og var handtekinn.
Fólkið var flutt í fangageymslur alríkislögreglunnar og þar með lauk 41 daga hernáminu í Oregon-ríki.
Hópurinn sem hernam svæðið komst í heimsfréttirnar 2. janúar síðastliðinn. Með hernáminu var hópurinn að mótmæla handtöku tveggja bænda, sem eru nú í fangelsi fyrir sinubruna á landi í eigu ríkisins.
Sjá einnig: Hernámið í Oregon: Forsprakkinn handtekinn
Hópurinn greindi frá því að ríkisstjórnin hafi áratugum saman stolið landi af bændum. Því hernámu þeir náttúruverndarsvæðið svo að bændur gætu flutt þangað og ræktað landið án afskipta ríkisstjórnarinnar.
Ammon Bundy, forsprakki hópsins, var í lok janúar handtekinn ásamt öðrum úr hópnum. Í aðgerðum lögreglunnar lést einn úr hópnum en þrátt fyrir það héldu fylgjendur Bundy kyrru fyrir á Malheur National Wildlife-friðlandinu og sögðust ekki ætla að fara.