Hætta starfsemi á Kaesong-svæðinu í kjölfar eldflaugatilrauna Norður-Kóreumanna – Eina samstarf þjóðanna að ljúka
Suður-Kóreumenn hafa ákveðið að hætta allri starfsemi á Kaesong-svæðinu í kjölfar kjarnorku og eldflaugatilrauna nágranna þeirra í Norður-Kóreu.
Kaesong er iðnaðarsvæði í Norður-Kóreu, rétt við landamæri landanna, en svæðinu er sameiginlega stjórnað af Norður- og Suður-Kóreu. Þar með lýkur eina samstarfi þjóðanna á Kóreuskaganum.
Frá þessu er greint á vef BBC en ákvörðunin er liður í refsiaðgerðum gegn Norður-Kóreu.
Á svæðinu eru 127 fyrirtæki frá Suður-Kóreu með starfsemi og hafa þau notað ódýrt vinnuafl frá Norður-Kóreu við ýmiskonar framleiðslu. Svæðið er afar mikilvægt fyrir efnahag Norður-Kóreu og ein helsta tekjulind þjóðarinnar. Ljóst er að Norður-Kórea mun verða af hundruð milljónum dollara vegna aðgerða nágranna sinna í Suður-Kóreu.