Utanaðkomandi sérfræðingar komust að þeirri niðurstöðu að ekki sé um einelti að ræða innan vébanda íþróttafélagsins ÍBV í Vestmannaeyjum, heldur sé um neikvæð samskipti innan hópsins að ræða. Þetta kemur fram í tilkynningu sem meðal annars eyjar.net greinir frá.
DV greindi frá málinu í janúar en þar sagði að alvarlegt eineltismál hjá handboltadeild ÍBV væri til skoðunar. Um væri að ræða einelti sem piltar hjá meistaraflokki og öðrum flokki karla hefðu orðið fyrir.
Samkvæmt heimildum DV var um alvarlegt einelti að ræða og því voru utanaðkomandi fagaðilar fengnir til að rannsaka og leysa málið.
Eyjar.net vöku fyrst athygli á málinu en þá kom fram að Arnar Pétursson, þjálfari meistaraflokks karla í handbolta, hefði ákveðið að taka sér tímabundið leyfi frá þjálfun. Ástæðan fyrir því að Arnar ákvað að stíga til hliðar var vegna gruns um einelti innan æfingahóps félagsins.
Í niðurstöðu eineltisathugunar hjá ÍBV sagði orðrétt:
„Niðurstöður þessarar athugunar eru þær að ekki sé hægt að fullyrða að um einelti hafi verið að ræða skv. skilgreiningu þess í reglugerð nr. 1009/2015.
Hins vegar er ljóst að neikvæð samskipti innan hópsins hafi verið til staðar um nokkurn tíma og komið niður á liðsheildinni og samskiptamáta liðsmanna.“
Svo segir að stjórn ÍBV Íþróttafélags vilji brýna fyrir fólki að varast rætni, illmælgi og sleggjudóma í tengslum við þetta viðkvæma mál.
