Söngvarinn og lagahöfundurinn Eyjólfur Kristjánsson, eða Eyfi eins og við þekkjum hans best, er einn af okkar fremstu tónlistarmönnum og kemur reglulega fram ýmist með öðrum eða einn með kassagítarinn, síðast fyrir viku síðan þegar hann var leyniatriði á undan hljómsveitinni Foreigner á stórtónleikum þeirra í Laugardalshöll.

DV heyrði í eiginkonu Eyfa, Söndru Lárusdóttur eiganda snyrtistofunnar Heilsa og útlit, og spurði: Hvað segir eiginkonan um mann sinn?

„Eyfi er sennilega sá allra fyndnasti sem ég veit um, hann nær að láta alla missa það og grenja úr sér augun, og mjög minnugur, það er hægt að spyrja hann að öllu og hann veit svarið. Hann er sannur vinur vina sinna og besti vinur minn. Við eigum 20 ára sambandsafmæli og 17 ára brúðkaupsafmæli á þessu ári og hann segir alla daga við mig hvað hann elskar mig, það er örugglega það sætasta sem ég veit um. Hann er yngstur af sex systkinum og hann elskar að bjóða þeim í mat á afmælisdeginum sínum sem lýsir því best hvað hann er góður drengur sem elskar sitt fólk. Ljúfur drengur, mjög vel gefinn, örlátur, algjörlega fróður um allt, ekki bara músik og kvikmyndir. Fær alla til að missa sig úr hlátri.“