Já nú eru blendnar tilfinningar að bera blaðakonuna ofurliði. Hún hefur nú ekki verið sérdeilis mikill aðdáandi 50 Shades bókanna – hvað þá fyrstu myndarinnar. Reyndar viðurkennir hún fúslega að fyrstu bókina las hún með eyrunum og hafði því báðar hendur frjálsar – sem var prýðilegt í sumum köflunum.
E.L. James hefur hins vegar sætt töluverðri gagnrýni fyrir helberan misskilning á BDSM – sérstaklega hvað varðar allt sem lýtur að samþykki. Hér er pistill sem ykkar einlæg ritaði eitt sinn um það.
Blendnu tilfinningarnar tengjast hins vegar því hversu frámunalega kynþokkafullur aðalleikarinn í myndinni er. Jamie Dornan setti reyndar heimsmet í kynþokka án atrennu í hlutverki hins hrottalega fjöldamorðingja Paul Spector í þáttaseríunni The Fall, þar sem Gillian Anderson fylgdi reyndar fast á hæla honum. Í þeim þáttum fær írski hreimurinn hans að njóta sín svo um munar – og getum við sammælst um að hann verði bara ALLTAF með fimm daga skegg? ALLTAF!
En hér er ný stikla úr myndinni sem verður frumsýnd um allan heim á Valentínusardaginn, 14. febrúar. Í henni sjáum við svipmynd af stefnumóti þeirra Christians og Anastasiu – frekar sexí… Hvað finnst ykkur?
Kannski að ég mæti bara á myndina með eyrnatappa!
