Ellen er sannkölluð drottning spjallþáttanna, á pari við sjálfa Oprah. Hún hefur séð um eigin spjallþátt, The Ellen DeGeneres Show, síðan 2003 og núna er komið að nýjum þætti hennar, Game of Games, en sérstakur kynningarþáttur var frumsýndur 18. desember síðastliðinn.

Þættirnir byrja í sýningu þann 2. janúar næstkomandi, en NBC sjónvarpsstöðin lét gera alls sex klukkustunda langa þætti. Líklegt er þó að þeir verði fleiri, Ellen er dáð af áhorfendum og aðdáendum um allan heim og þættirnir eru stórskemmtilegir.

Þættirnir snúast um spurningar og þrautir. Átta keppendur keppa í fjórum þrautum, tveir í hverri þar sem einn vinnur. Fjórir sigurvegarar keppa síðan saman í lokaþrautinni þar til einn stendur eftir. Sá einstaklingur á síðan kost á að setjast í Heita sætið (Hot Seat) og svara spurningum á tíma. Fjöldi réttra svara segir til um hversu háa peningafjárhæð hann fer með heim. Í heildina getur hann unnið sér inn 100.000 dollara eða um 10,5 milljónir íslenskra króna.

Það má alveg gera sig að fífli fyrir minni fjárhæð, því að leikirnir snúast akkúrat um það. Ellen fer alla leið með galsann og grínið, þrautirnar eru hver annarri fyndnari og Ellen sjálf er við stjórnvölinn, spyr spurninga og ýtir á takka.