Í janúar opna þær Súkkulaðisetur á Rauðarárstíg 1 þar sem boðið verður upp á tónheilun, djúpslökun, hugleiðslu, jóga, súkkulaðiseremóníur og allskyns „gúrme“ fyrir líkama og sál. Einnig munu þær bjóða upp á einkatíma, námskeið og einstaka viðburði.
Þetta er allra fyrsta Súkkulaðisetur Reykjavíkurborgar og hefur það að sérstöðu að kakóplantan er leiðandi í allri vinnu sem þar fer fram. Súkkulaðið sem notast er við er 100% hreint, handunnið kakó frá regnskógum Guatemala og hefur verið notað sem hjartaopnandi lyf af Maya indjánum svo öldum skiptir.
„Við upplifum að við sem samfélag séum að ganga í gegnum miklar breytingar í kjölfarið á þeim byltingum sem hafa hreyft við öllu undanfarna mánuði, þar má nefna #metoo, #égerekitabú, #höfumhátt og svo framvegis. Því finnst okkur mikilvægt að opna rými þar sem leyfi er til að staldra ögn við, tengjast eigin hjarta og líta inn á við. Rými til að anda, endurspegla, hlaða batteríin og heila. Svo ANDAGIFT Súkkulaðisetur verður griðastaður þar sem auðvelt verður að gefa sér frí frá amstri hversdagsins og njóta ilmandi súkkulaðibolla í róandi og hlýju umhverfi,“ segir Lára.
„Þetta er okkur hjartans verkefni og það hefur verið algjörlega stórkostlegt að vinna saman að þessu hingað til og nú leitum við eftir stuðningi svo þessi draumur megi verða að veruleika,“ segir Tinna.
Á Karolinafund býðst öllum að taka þátt í hreyfingunni og með því að styrkja verkefnið gefur þú þér um leið gjöf sem tryggir þér gæðastund í ANDAGIFT. „Við stefnum á að ná takmarkinu á þremur vikum og því hvetjum við alla til þess að taka þátt og þannig næla sér í gúmmelaði fyrir líkama og sál á nýju ári.“
Söfnunin er opin til 12. janúar 2018 og má finna hér.
