UNICEF hóf söfnunina og Erna Kristín og Sara Mansour tóku hana yfir og héldu meðal annars styrktartónleika á Húrra, þar sem Karitas Harpa Viðarsdóttir rakaði af sér augabrúnirnar í beinni útsendingu, en hún hafði heitið að gera það næði söfnunarfé 2 milljónum króna.
Aníta Estíva og Tara Brekkan ákváðu að leggja söfnuninni lið og skora á sjálfar sig um leið.
Ef þær ná að safna 200.000 kr. fyrir lok næstu helgi þá ætla þær að stökkva saman út í sjó í beinni á Snapchat.
„Börn Róhingja eiga um virkilega sárt að binda. Þau eru ein, umkomulaus og að flýja ofbeldi. Þau hafa ekkert skjól og engan mat nema að þeim verði lagt lið,“ segir Tara.
„Báðar erum við óendanlega sjóhræddar og því stórt skref fyrir okkur. Okkur þætti virkilega vænt um að þið mynduð styrkja þetta verðuga málefni með því að leggja inn sama hvaða upphæð sem þið hafið tök á. Allt hjálpar,“ segir Aníta.
Fylgjast má með þeim á Snapchat, Aníta: anitaeh og Tara: tara_makeupart.
