Október er mánuðurinn þar sem við vekjum athygli á brjóstakrabbameini og þrátt fyrir að mikilvægt sé að fjalla um einkenni og hvetja allar konur til þess að fara reglulega í skoðun, þá er einnig mikilvægt að tala um hvað gerist eftir að kona greinist og fagna þeim sem sigra í baráttunni.

Metro birti myndaseríu í samvinnu við Stand Up To Cancer herferðina, fjórtán konur sem greinst hafa með krabbamein. Sumar kvennanna eru enn í meðferð en aðrar hafa sigrað krabbameinið en allar hafa það sameiginlegt að skarta öri þar sem brjóst þeirra voru áður.

Myndaserían sem kallast Mastectomy eða Brjóstnám á íslensku er ætlað að sýna fram á það að konur geti farið í brjóstnám án þess að tapa hamingjunni og ást á líkama sínum.

Ami Barwell ljósmyndari myndaði konurnar og segir hún að móðir sín sem greindist með brjóstakrabbamein árið 1993 og sigraði baráttuna eftir mikil og erfið veikindi hafi verið innblástur hennar að herferðinni.

Myndirnar eru vægast sagt áhrifamiklar og fallegar í senn.