Manuela Ósk Harðardóttir, fegurðardrottning, fyrirsæta og allsherjar athafnakona, hefur dvalið í Los Angeles að undanförnu. Hún stundar þar nám við Fashion Institute of Design and Merchandising og vinnur að gráðu í samfélagsmiðlum (Social Media).
Það gengur ljómandi vel hjá Manuelu en á dögunum hlotnaðist henni sá mikli heiður að komast á Honor Roll vegna góðra einkunna. Við á Bleikt ákváðum að hafa samband við Manuelu og forvitnast aðeins um lífið í L.A.
Hún segir námið krefjandi og kennarana kröfuharða. „Ég fékk 4.0 GPA skor sem er hæsta mögulega einkunn og komst þess vegna á Honor Roll. Þetta er mikill heiður. Ég er í fullri vinnu við að fara út fyrir þægindarhringinn í skólanum!“
Manuela segir að lífið í L.A. sé frábært. „Við erum öll að blómstra hér – sem er dásamlegt, því ef þetta hefði hentað börnunum mínum illa þá hefði ég komið strax heim. Þau hafa aldrei verið vinafleiri og glaðari – og það gefur mér mesta peppið til að standa mig vel. Umhverfið hér er frábrugðið og það eru meiri möguleikar og meira skemmtilegt í gangi – en lífið er svipað – ef ég er ekki í skólanum þá er ég með börnunum mínum.“
„Ég hef lært af reynslunni að hugsa ekki of langt fram í tímann – því ég er alltaf að fá ný og spennandi tækifæri og maður veit aldrei hvert þau taka mann. Akkúrat núna er ég alsæl hér og er einbeitt í að klára námið.“
Síðar í mánuðinum er Manuela að fara til Filippseyja. „Hún Hildur María, Miss Universe Iceland, mun keppa fyrir Íslands hönd í Miss Universe. Ég er framkvæmdarstjóri keppninnar heima á Íslandi og þetta er í fyrsta skipti í 7 ár sem íslensk stelpa fer í Miss Universe. Hildur er að standa sig rosalega vel – og ég mæli með að allir fylgist með á samfélagsmiðlum (instagram: missuniverseiceland – snapchat: missuniverseice).“
Manuela er útskrifuð úr fatahönnunardeild Listaháskóla Ísland en síðasta haust hannaði hún úlpu fyrir Zo-On Iceland. „Ég er alltaf að hanna eitthvað í hausnum – og verkefnið sem ég gerði með Zo On gaf mér smjörþefinn af því hvað það er gaman að sjá hugmyndirnar sínar og hönnun fara alla leið. Mig langar að gera meira af því.“
