Instagram stjarnan og hundurinn Bee er með yfir tíu þúsund fylgjendur á Instagram. Eigendur hennar, Elvar Andri og Tanja Elín fengu hana í október 2015, en hún fæddist 28. ágúst sama ár. Bleikt hafði samband við Elvar og fékk að forvitnast aðeins um Bee og Instagram frægð hennar. Elvar og Tanja búa í Martin í Slóvakíu, en Bee fæddist í Tékklandi. Hún er hreinræktaður Italian Greyhound sem eru eins og smábörn að sögn Elvars. Það þarf að tannbursta þá, klæða þá í föt þegar það er kalt, bera á þá sólarvörn í sólinni og svo framvegis.
„Hún er æðislegur persónuleiki, hún er glöð, þarf mikla hreyfingu og það sem hún ELSKAR er að kúra með okkur og líka að liggja í sólbaði úti á svölum,“
sagði Elvar í samtali við Bleikt. Aðspurður hvernig Instagram ævintýrið þeirra hófst segir hann að upphaflega var hugmyndin sú að sýna vinum og fjölskyldu á Íslandi hundinn og í raun hvað hún væri falleg. Elvar gerði Instagram síðuna 19. september 2016 og nú fylgjast 10.600 einstaklingar með Bee.
Hvernig finnst ykkur viðbrögðin sem þið hafið fengið við Instagram síðunni?
„Það er gaman að hafa svona fylgjendur, gaman að fá jákvæð viðbrögð við myndum af henni. Síðan finnst mér gaman að dunda mér að taka myndir af henni.“
Fylgjendur Bee koma alls staðar frá og hefur það komið þeim á óvart hvað þau fá mörg „like“ miðað við fylgjendur.
Bee er ótrúlega sterkur og lífsglaður hundur og sýndi það sig svo sannarlega fyrstu áramótin hennar. Þegar hún var aðeins 4 mánaða datt hún og braut á sér framlöppina. Þau þurfti að bruna með hana upp á dýraspítala þar sem þeim var sagt að Bee þyrfti að fara í aðgerð. Þar sem þetta var yfir hátíðirnar þurftu þau að bíða í rúmlega viku og var Bee í miklum sársauka á meðan. Hún gat lítið hreyft sig og þurfti að vera í bleyju. Hún var mjög veik af verkjalyfjunum og var því ekki á lyfjum megnið af tímanum.
Hún fékk síðan skrúfur og plata var grædd í beinið. Platan hefur síðan verið fjarlægð með annarri aðgerð. Bee fór semsagt í tvær aðgerðir fyrir fimm mánaða aldur en lét það ekki stoppa sig og hljóp á eftir bolta í gifsinu sínu. Það sýnir heldur betur hvað Bee er einstakur, sterkur og lífsglaður hundur. Ekki skemmir fyrir hvað hún er hrikalega krúttleg og guðdómlega falleg.
Til að fylgjast með Bee á Instagram, sem við mælum algjörlega með, kíktu hér.
