Kvikmyndin Hjartasteinn var frumsýnd hér á landi í gær en hún er eftir Guðmund Arnar Guðmundson. Hann sagði í ræðu sinni fyrir sýninguna að ferlið hafi tekið um 10 ár og nú loksins gæti hann séð draum sinn rætast, að myndin sé sýnd í stóra sal Háskólabíós. Áður hafði myndin þó verið sýnd á kvikmyndahátíðum víðs vegar um heim og hlotið samtals 17 verðlaun.
Ég varð mjög hrifin og hélt myndin mér við efnið allan tímann. Myndin er mjög falleg og krakkarnir sem leika aðalhlutverkin, þau Blær Hinriksson, Baldur Einarsson, Diljá Valsdóttir og Katla Njálsdóttir skiluðu því vel af sér. Þau eru trúverðug í sínum hlutverkum sem hefur sjálfsagt ekki verið auðvelt að leika. Sagan snerti mig á svo margan hátt, fjallar um unglinga sem búa í litlu þorpi út á landi, hvernig líf þeirra fléttast saman og þau hafa samkennd hvert með öðru. Þessi mynd er sönn, spennandi, dramatísk og tekur á svo mörgu sem unglingar og fjölskyldur almennt þurfa að upplifa.
Ég hvet fólk til að skella sér í bíó, þetta er góð mynd til að fara á með unglinginn á heimilinu. Ég held að flestir geti fundið sig í einhverri af sögupersónunum. Ég mæli með henni og fær hún hjá mér 5 hjörtu af 5 mögulegum.
-Hekla Sól Kristjánsdóttir, 15 ára
