Það er ekki bara á Íslandi sem ungt fólk á í erfiðleikum með að kaupa sér sína fyrstu fasteign því ungir Bretar hafa ekki farið varhluta af hækkandi fasteignaverði.
Kærustuparið Adam Croft og Nikki Pepperell ákvað að fara heldur óhefðbundna leið í leit sinni að íbúð fyrir skemmstu. Í stað þess að lenda í skuldafangelsi það sem eftir er komust þau að þeirri niðurstöðu að hægt væri að fara ódýrari leið. Allt var þetta spurning um hvað þau gátu sætt sig við.
Adam, sem er 29 ára, og Nikki, sem er 32 ára, ákváðu því að leita sér að flutningabíl á uppboðsvefnum eBay. Þau fundu forláta Ford Transit-bifreið sem þau festu kaup á. Næsta árið fór í að innrétta bifreiðina og nú er heimili þeirra í bílnum tilbúið.
Eins og meðfylgjandi myndir bera með sér er heimili þessa unga pars nokkuð snoturt. Þar er allt til alls og þó að plássið sé ef til vill ekki mikið er það nóg fyrir þau tvö. Þarna er að finna lítið eldhús, klósett, sturtu, stofu og svefnrými. Og það sem meira er þá gerðu þau þetta án þess að setja sig á hausinn. Raunar kom það þeim á óvart hversu ódýrt þetta var. Bíllinn og innréttingarnar kostuðu tæpar tvær milljónir króna.
Adam og Nikki ætla að verðlauna sig fyrir að hafa tekið þessa frábæru ákvörðun. Þau stefna á ferðalag um Evrópu á bílnum – og taka heimilið að sjálfsögðu með sér.
Birtist fyrst í DV.
