Ný stikla fyrir kvikmyndina Bohemian Rhapsody kom út í dag.

Í henni má meðal annars sjá þegar meðlimir Queen hittast í fyrsta sinn og áhorfendur eru einnig kynntir fyrir Mary Austin (Lucy Boyton), lífsförunauti og vini Mercury.

Lög Queen heyrast, eins og We Are The Champions og We Will Rock You.

Kvikmyndin einblínir á fyrstu ár Queen fram að goðsagnakenndum flutningi þeirra á Live Aid tónleikunum árið 1985, og áherslan er á líf Mercury sem lést árið 1991.

Rami Malek leikur Mercury, aðrir hljómsveitarmeðlimir eru Brian May (Gwilym Lee), Roger Taylor (Ben Hardy) og John Deacon (Joseph Mazzello).

Það skemmtilega er að Mike Myers verður í kameó hlutverki í myndinni, en eitt af þekktari atriðum hans úr kvikmynd er í Wayne´s World þegar hann og vinir hans syngja Bohemian Rhapsody í upphafsatriði myndarinnar. Atriðið er orðið jafn þekkt og Queen lagið sjálft.

Mercury sjálfur samþykkti atriðið, en í viðtali við Rolling Stones kom fram að Myers hringdi á sínum tíma í Brian May gítarleikara og sagðist vera með þessa hugmynd. May samþykkti hana og þá spurði Myers hvort að Mercury vildi heyra það. „Freddie var mjög veikur á þessum tíma en ég sagði að ég væri viss um að hann vildi það. Myers lét mig hafa myndband sem ég fór með til Freddie, sem elskaði atriðið, skellihló og sagði að þetta væri frábært lítið myndband,“ segir May.

Bohemian Rhapsody er frumsýnd hér á landi 26. desember næstkomandi.