Sauðburður er nú að klárast hjá bóndanum Þórlaugu Guðmundsdóttur í Grindavík, en myndband af henni fyrir tveimur árum síðan vakti mikla kæti á YouTube. Af því tilefni var ákveðið að gera nýtt myndband þar sem Þórlaug segist sorrý og stefna að því að vera vegan eða hvað?

„Það var tilvalið að halda upp á tveggja ára afmælið með því að gera nýtt sauðfjármyndband með mömmu,“ segir Hanna Sigurðardóttir, dóttir Þórlaugar, en hún og Teresa Birna Björnsdóttir eiga Hönter myndir og taka þær að sér að semja texta, skesta og myndbönd fyrir afmæli, brúðkaup, árshátíðir eða aðra viðburði.

Það eru mæðgurnar sem leika í myndbandinu, ásamt Höllu Þórðardóttur og Grétari. Anna Sigríður Sigurðardóttir sér um sönginn og Hanna semur íslenskan texta við lag Justins Bieber Sorry.

Öll búa þau í Grindavík, en þar styttist óðfluga í bæjarhátíðina Sjóarinn síkáti, sem haldin verður að vanda um sjómannahelgina, fyrstu helgina í júní. Í fyrra gerði Hönter myndir myndband við lagið Despacito sem sló rækilega í gegn í heimabænum og víðar. Lagið var gert fyrir Appelsínugula hverfið, en bærinn skiptist í fjögur litahverfi fyrir bæjarhátíðina Sjóarinn síkáti.

Hafa má samband við Hönnu og Teresu hjá Hönter myndum í gegnum Facebooksíðu þeirra.