Óttar birti stöðufærslu á Facebook þar sem hann biður fylgjendur sína á Instagram um að hætta að fylgja sér hið snarasta. Ástæðan er sú að rússneskur hakkari yfirtók reikning hans í síðustu viku, lokaði á Óttar, skipti prófílmynd Óttars út fyrir fáklædda konu og hóf að senda fylgjendum Óttars ruslpóst í gríð og erg.

Í samtali við Fréttablaðið segir Óttar: „Rússarnir gera þetta víst, safna reikningum, til að geta spammað vini manns með vírusum,“ segir Óttar í samtali við Fréttablaðið og bætir við að einhvern fjárhagslegan ávinning sjái þrjótarnir sér líka í þessu þar sem þeir notu gervireikninga til þess að kynna vörur á vefsíðum. „Eða eitthvað þannig. Ég náði þessu ekki alveg.“

Hann segist þó hafa tekið skjáskot af færslum sínum í gegnum reikning konunnar sinnar og ætlar að færa þær yfir á nýjan reikning þar sem hann ætlar að huga betur að öryggismálum.

„Þetta er líka mér að kenna. Ég hefði átt að hafa þetta öruggara en það góða við þetta er að ég er búinn að uppfæra þessa hluti hjá mér alls staðar. Á samfélagsmiðlum, í tölvu, síma og svo framvegis.

Þannig að það kom kannski eitthvað gott úr þessu og ég mæli með að fólk geri slíkt hið sama vegna þess að þessum hakkaramálum á bara eftir að fjölga.“