Fyrsta stiklan úr bandarísku stórmyndinni Fast 8 var frumsýnd í gærkvöldi og er óhætt að segja að hún lofi góðu. Myndin var eins og kunnugt er tekin upp að hluta til á Íslandi og kemur Ísland við sögu í stiklunni.

Myndin, sem verður frumsýnd á næsta ári, skartar fjölmörgum stórleikurum og ber þar helst að nefna The Rock, Vin Diesel, Jason Statham og Charlize Theron.

Fast 8 er áttunda myndin í Fast and the Furious myndaflokknum. Tökur hérlendis fóru fram á Mývatni og á Akranesi fyrr á þessu ári og eru þær umfangsmestu sem ráðist hefur verið í hér á landi. Stikluna má sjá hér að neðan en Íslandi bregður fyrir þegar um tvær mínútur eru liðnar af stiklunni.