„Þú vilt ekki að Clint Eastwood sendi þér ákveðið augnaráð,“ segir bandaríski stórleikarinn Tom Hanks um hinn þaulreynda Clint Eastwood. Þeir Hanks og Eastwood unnu saman í fyrsta skipti í myndinni Sully sem frumsýnd var í haust.

Hanks var gestur Grahams Norton í samnefndum þætti á dögunum þar sem hann fór yfir samstarfið með Eastwood sem, þrátt fyrir að vera 86 ára, er enn í fullu fjöri. Hanks bar Eastwood góða söguna og sagði að hann væri leikstjóri sem gerði ríkar kröfur til leikara í myndum sínum. Hann ætti það til að vera hálf ógnvekjandi á köflum enda þekktur harðjaxl úr heimi kvikmynda.

Myndin er sannsöguleg og segir frá frægu atviki sem átti sér stað árið 2009 þegar flugstjórinn Chesley Sullenberger, eða Sully, neyddist til að nauðlenda farþegaflugvél á Hudson-ánni í New York. Um borð voru 155 manns og sluppu allir ómeiddir frá atvikinu. Í kjölfarið varð Sully að eins konar þjóðhetju í Bandaríkjunum.

Þó að Eastwood sé orðinn 86 ára er hann hvergi nærri sestur í helgan stein. Í haust var greint frá því að hann væri að íhuga að gera mynd um lífsreynslu Jessicu Buchanan sem var rænt af sómalískum sjóræningjum árið 2011.