Heimildamyndin Keep Frosen er tilnefnd til kvikmyndaverðlauna Cinema Scandinavia
Heimildamyndin Keep Frozen var á dögunum tilnefnd til kvikmyndaverðlauna tímaritsins Cinema Scandinavia sem er tímarit um norrænar kvikmyndir. Áhorfendakosning fer fram núna um helgina á vef tímaritsins
„Ég var ekki látin vita af þessari tilnefningu. Ég sá þetta fyrir tilviljun á vegg annarrar manneskju á facebook“ segir Hulda Rós Guðnadóttir leikstjóri myndarinnar sem er að vonum mjög ánægð með tilnenfninguna. „Tímaritið tók viðtal við mig í apríl eftir heimsfrumsýninguna Visions du Réel í Sviss,“ bætir hún við. En viðtal við Huldu birtist á tveimur heilum opnum í maí útgáfu tímaritsins.
Hulda hefur ferðast með myndina milli hátíða undanfarið. Keep Frozen var tilnefnd sem besta heimildamyndin á Nordisk Panorama í september og einnig á kvikmyndahátíðinni í Varsjá núna í október. „Kvikmyndahátíðin í Varsjá er ein af fáum kvikmyndahátíðum í heiminum sem er í flokki svokallaðra A-hátíða þannig að tilnefningin var mikill heiður,“ segir Hulda.
Næst verður myndin sýnd á Dok Leipzig sem er elsta og virtasta heimildamyndahátíð Þýskalands. Strax daginn eftir sýningu þar verður hún sýnd á Norrænum kvikmyndadögum í Lübeck. „Þannig að ég hleyp á milli til að vera viðstödd. Við erum með dreifingarsamning við Deckert distribution sem eru mjög stórir og erum því með meðbyr,“ segir Hulda. „Þau sögðu til dæmis nei við sýningu á kvikmyndahátíð í New York þar sem þeim fannst hátíðin ekki bjóða mér nógu mikið sem er ansi hressilegt viðskiptaattitjúd og hefur tekið mig smá tíma að læra inn á. Samstarfið við Deckert er því mjög lærdómsríkt.“
Hulda segir að fleiri stórir aðilar séu búnir að lýsa yfir áhuga á myndinni en það er allt ennþá á leynistigi. Hún reiknar þó með að RÚV sýni myndina á næsta ári auk þess sem ríkisútvarpið í Þýskalandi verður með klukkutíma þátt um Keep Frozen verkefnið í desember. „Það er ekki á hverjum degi sem íslenskur listamaður fær jafn mikla athygli frá þýskum fjölmiðlum“ segir Hulda að lokum og hlær.
