Skilaboð hafa gengið manna á millum á samfélagsmiðilsins Facebook þar sem notendur eru eindregið varaðir við að samþykkja vinabeiðnir frá reikningi sem ber nafnið Jayden K Smith. Þessu er einkum komið til skila í gegnum Facebook Messenger en sumir hafa gripið til þess ráðs að deila þessari viðvörun á Facebook veggnum sínum. Frá þessu greinir Pressan og segir jafnframt að um gabb sé að ræða. Notandinn Jayden K Smith sé ekki að senda vinabeiðnir í gríð og erg í þeim tilgangi að hakka sig inn á Facebook – reikninga fólks. Birgir Örn Guðjónsson, betur þekktur sem Biggi lögga hefur einnig kynnt sér málið og vitnar í erlenda miðla. Hann segir:
„Nei þarna. Þessi Jayden K. Smith er ekki einhver hættulegur hakkari sem hakkar þig inn á reikninginn þinn og vina þinna ef þú samþykkir hann sem vin. Það virkar bara ekki þannig. Sá sem byrjaði þennan póst var heldur enginn tölvuhakkari en engu að síður ágætis tölvuprakkari sem fékk fullt af fólki um allan heim til að áframsenda tilgangslausan póst.“
