„Mér líður eins og ég sé að svara spurningu á samræmdu prófunum eða gera upp á milli barnanna minna því ég er gríðarlega mikið jólabarn,“ segir Eva Ruza, skemmtikraftur og Snapchat-stjarna, í viðtali við DV um uppáhaldsjólalagið sitt.
„En ég verð að segja að Baggalútsmenn eiga sérstakan stað í hjarta mínu, með næstum öll sín lög. Uppáhaldsjólalagið mitt frá þeim í augnablikinu er Stúfur sem þeir tækla með Frikka Dór. Mig langar alltaf að dansa þegar ég heyri Stúf, og ef mig langar að dansa þá þýðir það að lagið sé negla! Ég hef farið síðustu fjögur ár á jólatónleika með þeim og jólin svífa inn í hjarta mitt í þessu mikla partíi sem þeir halda árlega í Háskólabíói.“
Eva heldur einnig mikið upp á lagið Ef ég nenni, með Helga Björns, og syngur hún alltaf hátt og skýrt með.
„Ég get eiginlega ekki sleppt því að nefna vin minn Michael Bublé og jólalistann hans. Þann lista hef ég spilað endurtekið öll jól síðan ég var ung dama.“
