„Í gær varð ég vitni að kraftaverki,“ segir Sveinn Hjörtur Guðfinnsson og bætir við í samtali við DV: „Mikil þörf á að minna á þessa hljóðu vinnu. Við viljum öll njóta og eiga jólin með fjölskyldu og ástvinum. Í heimi í dag er böl víða og margir ná ekki að halda jólin. Það er nöturleg staðreynd sem við ættum að íhuga vel og gera til breytni til hins betra.“
„Ég sá hóp af sjálfboðaliðum og kraftmikla einstaklinga skila æri miklu dagsverki. Með vinnu sinni og þátttöku allra þeirra sem lögðust á það eitt að reyna eftir bestu getu að gera jólin bærileg fyrir þá sem þurfa aðstoð. Að baki eru einnig fyrirtæki og félagssamtök sem hafa eitt markmið – að gefa!“
Í gær 20. desember var árleg jólaúthlutun hjá Mæðrastyrksnefnd Reykjavíkur.
„Sá einstaki hópur kvenna sem í gegnum árin hafa staðið fyrir aðstoð og farsælu uppbyggingarstarfi til kvenna og byggt upp von, hjálpað ótal fjölskyldum og einstæðingum, hópur sem vinnur að möguleikum kvenna til menntunar og upprisu, hópur sem er óeigingjarn í vinnu sinni. Það er hópurinn sem stendur að baki Mæðrastyrksnefndar Reykjavíkur.“
Sveinn Hjörtur er þakklátur fyrir að hafa kynnst starfi Mæðrastyrksnefndar.
„Sú vinna er oft á tíðum hljóð og vinnst án hamarshögga né hljóða. Ég er stoltur og hlakka til að hefja nýtt ár með þeim úrvalshóp sem vinnur hið hljóða verk samfélagsins. Gleðileg jól til allra þeirra sem lögðu til vinnu, verk, og elju til þess að létta undir með öðrum. Mér finnst mikilvægt að minnast þessara aðila og þakka fyrir. Þannig gerast kraftaverkin og þau vinnast í þögn kærleikans.“
