Laugardaginn, 30. september, milli 14 og 16 verður opið hús í Pakkhúsi Hróksins. Liðsmenn Hróksins stefna í næstu viku á að fara með gleði í farangrinum á hamfarasvæðin í Uummannaq. Hrafn Jökulsson forseti Hróksins segir:
„Þarna eru næstum 200 flóttamenn sem aldrei fá að snúa aftur í litlu þorpin sín vegna hættu á frekari hamförum, í þeim hópi um 70 börn. Mikilvægast er fyrir börnin að upplifa eitthvað skemmtilegt, jákvætt, gleðilegt og við ætlum að sjá um það nú og áfram.“
Hrafn segir að besta leiðin til að takast á við áföll hjá börnum er að skapa mótvægi og yndislegar minningar, kærleika og gleði. Með í för verða Axel Diego og Bjarni Árnason frá Sirkus Íslands.
„Ef þið lumið á einhverjum fisléttum og meðfærilegum gjöfum er allt slíkt vel þegið. Föt vantar ekki, nema sérverkefnadeildin hefur verið beðin um að útvega góðar úlpur fyrir nokkrar stúlkur á aldrinum 11 til 26 ára. En fyrst og fremst: Kom fagnandi á laugardaginn!“ segir Hrafn og bætir við að sirkus listamennirnir verði enn fremur í Pakkhúsinu um helgina.
Hrafn segir að lokum:
„Hjálpið okkur að gera gleðinnar hátíð á hamfarasvæði að veruleika!“
Þau sem vilja styðja við bakið á grænlenskum börnum sem eiga um sárt að binda er bent á reikningsnúmer Hróksins
Reikningur: 513-26-1188 – Kennitala 620102-2880 – Gens una sumus / Við erum ein fjölskylda.
