Værir þú til í að sigla um heimsins höf á skemmtiferðaskipi og fá borgað fyrir það? Margir myndu eflaust svara þessari spurningu játandi og kannski ekki síst eftir að hafa hlustað á frásögn Bretans Chris Wong sem síðastliðin tólf ár hefur starfað fyrir Royal Caribbean.

Wong heldur úti vinsælli rás á YouTube þar sem hann segir frá lífinu um borð og deilir ýmsum fróðleik um ferðir og ferðalög.

Í nýlegu myndbandi opinberaði hann að hann væri að hætta störfum. Frá árinu 2013 hefur hann starfað hjá Royal Caribbean, lengst af í spilasölum sem eru um borð í skipum fyrirtækisins

Í fyrrnefndu myndbandi birti hann einnig mynd af launaseðli sínum fyrir síðustu vinnulotu sína sem stóð yfir í tvær vikur. Er skemmst frá því að segja að fyrir þessar tvær vikur fékk hann 4.340 dollara í útborguð laun og þjórfé, samtals 527 þúsund krónur.

En eru þetta góð laun?

Sjálfur er Wong þeirrar skoðunar að þetta séu frábær laun þegar allt kemur til alls. Útgjöld hans um borð eru lítil sem engin, hann þarf aðeins að greiða fyrir farsíma og internet, en þarf ekki að greiða fyrir hús eða bíl til dæmis. Getur hann þar af leiðandi sparað sér talsverða fjármuni.

Maturinn um borð er ókeypis og á milli vakta getur hann dvalið um borð og búið í skipinu.

Í umfjöllun Mail Online er frásögn annars starfsmanns skemmtiferðaskips rifjuð upp en sá lýsti lífi sínu um borð í þræði á Reddit. Lýsti hann því að starfsfólk þurfi að eiga við allskonar fólk en mjög auðvelt sé að gleðja áhöfnina.

„Vertu bara almennilegur. Það er bókstaflega allt sem þarf. Við þurfum að fást við alls konar kröfuhart fólk,” sagði viðkomandi áður en hann kom með ráð til þeirra sem hyggja á starf um borð í skemmtiferðaskipið. Benti hann á að vinsælasta og eftirsóttasta starfið væri að komast að sem skemmtikraftur.

„Þeir hafa langmestan frítíma og eru mjög vel launaðir,“ sagði hann.