Á miðvikudagskvöldið fóru fram stórtónleikar hljómsveitarinnar Coldplay í Boston þar sem 66 þúsund manns mættu til að hlýða á sveitina. Eins og nánast hefð er fyrir á fjölmennum viðburðum vestra, til að mynda íþróttakappleikum og tónleikum, var svokölluð „Kossa-vél“ (e. Kiss-cam) á ferðinni og varpaði myndum af allskonar pörum í áhorfendaskaranum á risaskjái sem voru öllum sýnilegir.
Skyndilega beindist myndavélin að pari einu sem augljóslega dauðbrá. Konan sneri sér hratt við og maðurinn nánast henti sér til hliðar. Atburðarásin ein og sér vakti mikla athygli en það voru síðan orð Chris Martin, forsprakka Coldplay, sem innsigluðu eitt pínlegasta hneykslismál seinni tíma.
„Annað hvort eru þau að stunda framhjáhald eða þá að þau eru bara mjög feimin,“ sagði Martin hlæjandi.
Hið fyrrnefnda reyndist rétt.
Eftir að myndskeiðið hafði dreifst hratt út á samfélagsmiðlum eftir tónleikana þá voru bandarískir miðlar fljótir að grafa upp hvaða fólk þetta var. Um var að ræða forstjóra gervigreindarfyrirtækisins Astronomer, Andy Byron, og nýráðinn mannauðsstjóra fyrirtækisins, Kristin Cabot.
Þá gjörsamlega sprakk málið út og eru margir á því að þetta sé á leiðinni að verða „einn stærsti skandall í sögu internetsins.“
Kristin Cabot er laus og liðug eftir skilnað fyrir nokkrum árum en Andy Byron er giftur og á tvö börn með eiginkonu sinni. Nokkrum klukkustundum eftir að atvikið fór í dreifingu á samfélagsmiðlum tóku netverjar eftir því að eiginkona Andy, Megan Kerrigan Byron, hafði fjarlægt eftirnafn eiginmannsins af nafni sínu á Facebook. Stuttu síðar lokaði hún síðunni sem og Instagram-síðu sinni.
Miðað við umfjöllunina var Andy ekki stætt á öðru en að bregðast við og það gerði hann með yfirlýsingu núna í morgunsárið. Þar baðst hann innilegrar afsökunar á persónulegum mistökum sínum sem hefðu verið opinberuð fyrir allra augum. Bað hann sérstaklega eiginkonu sína, fjölskyldu og vinnufélaga hjá Astronomer afsökunar.
„Þið áttuð betra skilið frá mér sem eiginmanni, föður og leiðtoga,“ skrifaði Andy og sagðist ætla að nota næstu daga til að hugsa sinn gang og næstu skref.
Því næst sneri hann sér að Coldplay og var greinilega ósáttur.
„Ég vil einnig láta í ljós hve óþægilegt mér finnst að augnablik sem átti að vera einkamál varð opinbert án míns samþykkis. Ég ber virðingu fyrir listafólki og skemmtikröftum, en ég vona að við getum öll velt því fyrir okkur hvaða áhrif getur haft að búa til sýningu úr einkalífi fólks.“
Síðasta málsgreinin hefur hleypt illu blóði í marga netverja sem telja forstjórann vera að varpa ábyrgð á eigin mistökum og skertu siðferði yfir á hljómsveitina. Ljóst er að málinu er hvergi nærri lokið.
