Sigga Kling, spákona og skemmtikraftur, fékk nýlega heilablóðfall í kjölfar blóðtappa. Sigga mætti í Bakaríið á Bylgjunni í gær þar sem hún sagði frá atvikinu og kvaddi um leið niður flökkusögur um ótímabært andlát sitt.
„Og ég gat bara ekkert; ég átti að skemmta í Garðarholti í afmæli og ég mæti alltaf… með 40 stiga hita, skiptir ekki máli, alveg sama hvað hefur komið upp á. Og ég hélt ég væri með lágan blóðþrýsting; ég hafði aldrei fengið það en mér fannst það svona lýsa sér á Google, það gæti verið… ég bara gat ekkert. Svo fer ég út í bílinn að keyra og svo sé ég allt tvöfalt, þrefalt, fjórfalt og ég finn að ég á erfitt með að tala og svona. Og það hangir á mér andlitið í speglinum. En ég held ennþá að þetta sé lágur blóðþrýstingur,“ segir Sigga sem fór að finna fyrir miklum slappleika fyrir einum þremur vikum síðan.
Daginn eftir fannst Sigga hún orðin hressari, en þegar leið á daginn versnaði henni aftur. Henni fannst óþarfi að fara á bráðamóttökuna, en um þrjúleytið um daginn var Stína systir hennar mætt með lakkrís, enda eina ráðið að sögn Siggu til að hækka blóðþrýstinginn. Skömmu síðar voru sjúkraflutningamenn mættir heim til Siggu.
Blóðþrýstingurinn var fínn en „eins og það hefði verið setið á andlitinu á mér í viku,“ segir Sigga, en í ljós kom að hún hafði fengið meðalstóran blóðtappa, sem stöðvaði blóðflæði til heilans og leiddi til heilablóðfalls.
Ekki auðveldasti sjúklingurinn
Sigga segist alls ekki hafa verið auðveldasti sjúklingurinn meðal hún lá inni á Landspítalanum þessa daga og útskrifaði hún sjálfa sig tvisvar. Var hún sett á blóðþynnandi lyf og geymir þau í eggjabakka, sem hún segir gott ráð til að muna að taka þau.
Aðspurð um af hverju hún opinberar sjúkrasöguna segir Sigga gróusögur hafa verið komnar af stað.
„Það eru komnar flökkusögur um að ég hafi verið á skemmtun og sjúkrabílarnir og eitthvað. Og það er líka komin ein flökkusaga að ég sé dauð.“
Sem augljóslega er ekki flökkusögunum samkvæmt en Sigga segir að henni finnst hún breytt. „Ég er með þrjá punkta á heilanum, hvíta, sem er skemmdin og mér finnst, ég er bara svo hrifin af doppum. Í alvörunni, ég elska doppur!“ segir Sigga sem lét laga á sér hárið og augabrúnirnar, svona til að líta vel út í kistunni, ef flökkusögurnar myndu rætast. Hún ætlaði ekki að láta Rögnu Fossberg um útlitið, heldur vera búin að því sjálf.
„Lífið er galdur og þú getur galdrað svo marga hluti, og ég hef kallað veikindin til mín. Ég hef verið í einhverri uppgjöf. Ég er búin að vera ömurleg í þrjár vikur. Ertu ekki að hlusta á mig Svavar? Ertu að horfa á krýninguna? Þetta er týpískt með alla menn sem ég tala við, þeir hlusta ekki á mig.“
Vill vekja fólk til meðvitundar
Sigga vill vekja fólk til meðvitundar um einkenni heilablóðfalls, hún segir það hafa tekið hana sólarhring að leita sér aðstoðar þar sem hún hélt hún væri með lágan blóðþrýsting.
Hvað er heilablóðfall og hver eru byrjunareinkenni og afleiðingar heilablóðfalls?
(Tekið af hjartaheill.is)
Heilablóðfall eða heilaslag er afleiðing skyndilegrar og varanlegrar truflunar á blóðflæði til heilasvæða af völdum æðasjúkdóma. Blóðflæðitruflunin getur orsakast af stíflu í heilaslagæð af völdum blóðtappa (heiladrep) eða því að æð brestur og blæðir í heilavefinn (heilablæðing). Í báðum tilvikum líða heilafrumur, sem æðin nærir súrefnisskort, auk skorts á öðrum nauðsynlegum næringarefnum. Hluti heilafrumanna deyr, en starfsemi annarra raskast. Stundum koma einkenni um heilablóðfall einungis fram í stuttan tíma og er þá talað um skammvinna blóðþurrð í heila. Ýmsir sjúkdómar geta stuðlað að heilablóðfalli. Einkennin sem koma fram eru háð staðsetningu og stærð skemmdarinnar í heilanum.
Byrjunareinkenni og afleiðingar heilablóðfalls
Mikilvægt er að leita aðstoðar sem fyrst og hefja læknismeðferð. Hringið í lækni, jafnvel þótt einkenni virðist vera að ganga til baka. Hringið á neyðarbíl í síma 112, ef einkenni fara versnandi. Byrjunareinkenni geta verið skyndilegur slæmur höfuðverkur, ógleði, uppköst eða skert meðvitund auk framangreindra atriða.
